Guddoomiyaha baarlamaanka dalka Moses Wetang’ula ayaa guddiyada kala duwan ee golaha qaran ee xeer dejinta faray in ay billaabaan turxaan bixinta 14 qof oo loo soo magacaabay xilalka xoghayeyaasha wasaaradaha dowladda sare.
Waxaa guddiyada laga doonaya in ay warbixintooda soo gudbiyaan 22-ka bisha Afaraad ee April ee sanadkan.
Waxaa uu Moses Wetang’ula hoosta ka xarriiqay in geeddisocodka ansixinta uu noqonaya mid si buuxda u waafaqsan xeerka baarlamaaniga ee mas’uuliyiinta loo soo magacaabo qabashada xilalka dadweynaha loogu adeego.
Geeddisocodka turxaan bixinta xoghayeyaasha magacaaban ayaa billaaban doono 4-ta bisha Afaraad.
Guddiga baarlamaanka u qaabilsan maamulka iyo amniga gudaha ayaa su’aallo waydiin doono Axmad Cabdisalaan oo loo soo magacaabay xoghayaha waaxda isku duwidda howlaha dowladda sare.
Stephen Isaboke, oo uu madaxweynaha dalka William Ruto u magacaabay xoghayaha waaxda warfaafinta iyo isgaarsiinta ayaa isna hor tagi doono guddiga isgaarsiinta , warfaafinta iyo hal-abuurka ee baarlamaanka dalka.
Guddiga arrimaha waxbarashada ee baarlamaanka ayaa turxaan bixin doono Cabdulrazaak Shaukat, oo ah xoghayaha magacaaban ee waaxda sayniska, cilmi baarista iyo hal-abuurka.
Xoghayeyaasha kale ee uu soo magacaabay madaxweynaha qaranka ee laga wareysan doono aqoontooda, khibradooda , hufnaantooda iyo gudashada waajibaadka loo igmaday waxaa ka mid ah Oluga Fredrick Ouma(Adeegyada caafimaadka),Jane Kere Imbunya( Adeegga dadweynaha iyo horumarinta karaanka aadanaha) ,Michael Lenasalon( Dowlad wadaajinta) ,Carren Ageng’o Achieng( Daryeelka carruurta),Cyrell Odede Wagunda(Maalgashiga), Bonface Makokha(Qorsheynta dhaqaalaha) ,Fikirini Katoi Kahindi(Arrimaha dhallinyarada),Regina Akoth Ombam(Ganacsiga),Caroline Wanjiru Karugu(Arrimaha jaaliyadda bariga Afrika) ,Judith Nayaiai Pareno( Cadaaladda , xuquuqul aadanaha iyo arrimaha dastuurka) iyo Aaden Cabdi Millah( Maraakiibta iyo arrimaha badaha).
Guddoomiyaha baarlamaanka dalka Moses Wetang’ula ayaa carrabka ku adkeeyay in guddiyada turxaan bixinta sameynaya laga doonaya in aynan qaadan wax ka badan 28 cishe sida uu dastuurka qabo.
