Wasiirka Adeegga Dadweynaha Geoffrey Ruku ayaa ugu baaqay dadka ku nool dowlad deegaanka Kiambu in aysan ka cabsan waxa uu ku tilmaamay cadaadis siyaasadeed oo uga imaanaya madaxweyne ku xigeenkii xilka laga qaaday ahna hoggaamiyaha xisbiga DCP Party Rigathi Gachagua iyo kooxaha uu taageero.
Isagoo ka hadlayay munaasabad aroos oo ka dhacday Kiambu Sabtidii, Ruku ayaa sheegay in shacabka gobolka bartamaha dalka ay sii wadaan taageerada dowladda, isaga oo sheegay in hadallada mucaaradka ay yihiin olole siyaasadeed oo aan wax natiijo ah lahayn. Waxaa uu sheegay in aan loo ogolaan doonin hoggaamiyeyaal hore ugu jiray dowladda balse aan waxqabad muuqda sameyn inay marin habaabiyaan shacabka.
Ruku ayaa ballan qaaday inuu difaaci doono dowladda Kenya Kwanza ee uu hoggaamiyo madaxweyne William Ruto ilaa sanadka 2032, isaga oo sheegay in dowladda ay diiradda saareyso horumarinta nolosha dadka, abuurista shaqooyin iyo xoojinta adeegyada dadweynaha. Waxaa uu sidoo kale ku eedeeyay mucaaradka inay isku dayayaan inay beddelaan taariikhda siyaasadeed, isagoo sheegay in qaar badan oo ka mid ah ay hore xilal sare u soo qabteen balse aysan hirgelin isbeddel dhab ah.
Isagoo si toos ah u dhaliilay Gachagua, Ruku ayaa sheegay in siyaasadda ku dhisan muujinta awoodda gobolka aysan shaqeyn doonin, isaga oo tusaale u soo qaatay doorashadii ku celiska ahayd ee ka dhacday deegaanka Waqooyiga Mbeere halkaas oo Leo Wamuthende uu ku guuleystay kursiga xildhibaanimo, isagoo ka adkaaday musharrixiin la safnaa Gachagua. Ruku ayaa ku adkeeyay in hoggaanka uu ku yimaado adeeg iyo horumar, ayna muhiim tahay in shacabka Kiambu ay taageeraan midnimada qaranka iyo siyaasadda diiradda saarta horumarka.
