Wasaaradda Waxbarashada ayaa shaacisay in dowladda ay qorsheyneyso in iskuulo qaar oo ardayda ku yar yihiin la mideeyo. Ujeeddada ayaa ah in hay’adahaas loo beddelo adeegyo kale oo wax ku ool ah, isla markaana la ballaariyo awoodda iskuullada kale ee ardayda ku badan yihiin, iyadoo la dhisayo qolal jiif iyo fasallo dheeri ah si loo qaabilo ardayda la wareejinayo.
Xoghayaha Joogtada ah ee Waxbarashada Aasaasiga ah, Julius Bitok, ayaa sheegay in qorshahan uu ka qeyb qaadanayo in la helo iskuulo tayo leh oo ku filan guud ahaan dalka. Waxaa uu intaa ku daray in dowladda ay maalgelin dheeri ah gelin doonto nidaamka waxbarashada, si iskuullada loo siiyo maktabado, qolal jiif, iyo macalimiin ku filan, si ardayda ay u helaan fursado waxbarasho oo wanaagsan.
Sanadkan, iskuulo badan oo heerar kala duwan ah ayaa la kulmay arday yar oo soo galaya fasalka 10-aad, gaar ahaan iskuullada loo yaqaan Cluster 4 ama iskuullada degmooyinka, taasoo sababtay fasallo faaruq ah ama tiro arday oo aad u yar. Madaxa iskuullada ayaa dhibaatada ku eedeeyay habka cusub ee loo kala dhigayo ardayda iyo habka loo oggolaaday in ardayda ay u beddeshaan iskuullada, taasoo adkeysay xaaladda.
Sannadkii hore, Wasiirka Waxbarashada, Julius Ogamba, ayaa sheegay in mideynta iskuullada ardayda ay ku yar yihiin ay muhiim u tahay hufnaanta qaybinta kharashaadka iskuullada, isaga oo tilmaamay in qaar ka mid ah dugsiyada dalka ay ka hooseeyaan 10 arday, taasoo ka dhigaysa iskuuladaas mid aan wax faa’iido ah u lahayn nidaamka waxbarashada.
