Waaxda Socdaalka ayaa beenisay eedaha sheegaya in baasaboorrada dalka la siiyay shakhsiyaad ajnabi ah oo lala xiriirinayo kooxaha maleeshiyaadka ee ka dagaalamo Suudaan ee RSF-ta.
Isagoo ka soo hor muuqday Guddiga Amniga Gudaha Barlamaanka Isniintii, Xoghayaha Joogtada ah ee Socdaalka, Belio Kipsang, ayaa sheegay in dukumentiyadaasi ay kaliya siiyaan muwaadiniin Kenyaan ah oo la xaqiijiyay.
Tani ayaa timid ka dib markii dukumentiyo sir ah oo ka yimid Waaxda Socdaalka la shaaciyay, kuwaas oo muujinaya in baasaboorrada dalka la siiyay shakhsiyaad ajnabi ah, oo ay ku jiraan xubno la sheegay inay RSF-ta ka tirsan yihiin. Kipsang ayaa beeniyay eedahaas, isaga oo caddeeyay in nidaamyo adag oo xaqiijin ah la raaco si looga hortago in aan qof aan muwaadiniin ahayn uu helo baasaboorrka waddanka.
Xoghayaha ayaa sharaxay in habka codsiga baasaboorka uu u baahan yahay in codsadaha uu soo bandhigo aqoonsi qaran oo sax ah ama shahaadada dhalashada, kuwaas oo laga hubiyo keydka dowladda ka hor inta aan baasaboorka la bixin. Waxaa warbixinnada lagu sheegay in qaar ka mid ah shakhsiyaadka RSF-ta laga yaabo inay helaan dukumentiyada safarka Kenya, taas oo dhalisay walaac amni. Magacyada lagu sheegay ayaa waxaa ka mid aha Algoney Hamdan Dagalo oo ah sarkaal sare oo RSF ka tirsan iyo ganacsade Zimbabwean ah oo lagu magacaabo Wicknell Chivayo, oo sidoo kale la sheegay inuu si sharci darro ah u helay dhalashada dalka.
