Barasaabka dowlad deegaanka Kirinyaga Anne Waiguru ayaa ku boorrisay dowladda qaranka inay mudnaanta siiso beeraleyda bariiska ee Mwea iyadoo ka digtay in haddii aan sidaas la samayn ay wiiqayso wax soo saarka maxalliga ah isla markaana ay khatar gelin karto noloshooda.
Waiguru oo ka hadashay golaha deegaanka Kirinyaga ayaa ku nuuxnuuxsatay in inkastoo Kenya ay weli la kulmayso hoos u dhac ku yimid wax soo saarka bariiska, haddana danaha beeraleyda maxalliga ah ay tahay in la horumariyo.
Guddoomiyaha ayaa waxaa ay ugu baaqday dowladda inay iibsato dhammaan bariiska maxalliga ah ee la soo saaro ka hor inta aan la oggolaan soo dejinta bariiska canshuur la’aanta ah, iyadoo ku dooday in soo iibsiga bariiska ajnabiga ah ee beec jaban inta lagu jiro xilliga goosashada ay waxyeellayso beeraleyda iyadoo hoos u dhigaysa qiimaha.
Waiguru ayaa sidoo kale soo jeedisay in beeraleyda Mwea la siiyo xuquuqda iibsiga koowaad marka Mwea Rice Mills laga wareejiyo la haanshaha dowladda.
Hadalkeeda ayaa yimid iyadoo ay sii kordhayaan walwalka beeralayda bariiska ka dib amar uu soo saaray Wasiirka Maaliyadda John Mbadi, kaasoo u oggolaanaya soo dejinta bariiska heerka 1-aad ee bilaa canshuurta ah ilaa 31-da bisha December ee sanadkan.
Beeralayda maxalliga ah ayaa ka mudaaharaaday tallaabadaas, iyagoo ku andacoonaya in soo dejinta bariiska aan canshuurta lahayn ay durba buuxisay suuqa, taasoo hoos u dhigtay qiimaha bariiska maxalliga ah.
Toddobaadkii hore, Guddoomiyaha Beeralayda Bariiska Mwea Ndege Muriuki ayaa ka digay in siyaasadda ay saameyn xun ku yeelan karto beeralayda maadaama xilliga goosashada ugu weyn uu bilaabmayo.
