Koox xuquuqda aadanaha u doodda ayaa tilmaamtay inay tallaabo sharci ah ka qaadi doonto Guddiga Madaxa Bannaan ee doorashooyinka iyo Xuduudaha dalka ee IEBC iyo Guddiga Anshaxa iyo la dagaalanka Musuqmaasuqa ee EACC iyagoo ku guuldareystay inay tallaabo adag ka qaadaan kuwa ku xadgudbay sharciyada doorashada intii lagu jiray doorashadii ku celiska ahayd ee dhawaan la soo gabagabeeyay.
Hay’adda Vocal Africa ayaa sheegtay in labada hay’adood, iyo kuwo kale, ay ku guuldareysteen inay xakameeyaan oo ay la macaamilaan mas’uuliyiinta waxyeelleeyay sharafta codbixinta ee goobaha codbixinta ee kala duwan.
Warbixin ay siiyeen warbaahinta Arbacada maanta ah ayay Vocal Africa xaqiijisay in ka dib 14 maalmood ay maxkamad u gudbi doonaan si ay u dacweeyaan labada hay’adood.
Agaasimaha fulinta ee Vocal Africa Xuseen Khalid oo la hadlay saxaafadda, ayaa dalbaday in xilka laga qaado wasiiradda iyo saraakiisha dowladda ee ka qayb qaatay ololaha loogu jiro musharixiinta ay dowladda taageereysay.
Kooxda xuquuqda aadanaha ayaa ku adkeysatay in codbixinta ay ahayd mid aan caddaalad ahayn ka dib kiisas baahsan oo rabshado, cabsi gelin, iyo laaluush bixin, iyadoo ay jireen wax ka qabasho la’aan ka timid IEBC iyo EACC.
Waxaa ay sheegeen in haddii aan hadda tallaabo la qaadin, dalka uu halis ugu jiro inuu galo fowdo inta lagu jiro doorashooyinka guud ee 2027-ka.
