Madaxweynaha Mareykanka Donald Trump ayaa sheegay inuu ballaarin karo weerarradiisa aan horay loo arag ee ka dhanka ah kooxaha daroogada ee Latin America si ay u gaaraan dalka Mexico, sida ay qortay wakaaladda wararka ee Reuters iyo warbaahinta NBC.
Trump ayaan sheegin sida ama goorta ay dhici doonaan weerarrada noocaas ah. Madaxweynaha Mexico Claudia Sheinbaum ayaa hore u sheegtay inay ka soo horjeedo weerarrada noocaas ah ee ka dhaca dhulkeeda.
Hadalka Trump ayaa yimid laba toddobaad ka dib markii NBC, oo soo xiganaysa laba sarkaal oo dowladda ka tirsan, ay soo warisay in Aqalka Cad uu isu diyaarinayo marxaladaha hore ee howlgal dhulka ah oo ka dhaca Mexico kaas oo si wadajir ah ula shaqeyn doona hay’adaha sirdoonka Mareykanka. Warbixinta ayaa sheegtay in howlgalka uu diiradda saari doono weerarrada diyaaradaha aan duuliyaha lahayn ee ka dhanka ah shaybaarrada daroogada ee Mexico iyo xubnaha kooxaxa daroogada ka ganacsada.
