Barasaabka ismaamulka Isiolo Cabdi Guyo ayaa lagu wadaa in maanta uu horyimaado aqalka sare ee senateka iyadoo golaha uu bilaabaayo dhageysi guud oo socon doona muddo labo maalmood ah oo ku saabsan soo jeedinta xil ka qaadis lagu sameeyay.
Aqalka Senateka ayaa doortay in si buuxda loo horgeeyo dacwad loo dhan yahay ka dib markii ay diideen mooshin la doonayay in lagu dhiso guddi gaar ah oo ka kooban 11 xubnood oo baaraya eedeymaha ka dhanka ah guddoomiyaha.
Afhayeenka senateka Amason Kingi ayaa Talaadada maanta ah iyo Arbacada burrito ah sheegay in ay yihiin maalmo fadhi rasmi ah oo lagu tixgalinayo qaraarka golaha dowladda hoose ee Isiolo, kaas oo meel mariyay mooshinkii xil ka qaadista bishii hore.
16 ka mid ah 18-ka wakiil ee laga soo doortay dowlad deegaanka Isiolo ayaa u codeeyay in xilka laga xayuubiyo Guyo, iyaga oo ku eedeeyay ku takri falka xafiiska, anshax xumo weyn, iyo ku xad gudbid Dastuurka iyo sharciyada kale.
Aqalka sare ee Senetaka ayaa soo saaray jadwal tafatiran oo loogu talagalay dacwadaha sida ku cad Warqada Amarka ee Talaadada maanta ah. Dhageysiga dacwadda ayaa bilaabmi doontaa 9-ka subaxnimo.
