Madaxweyne William Ruto ayaa ku boorriyay Kenyaanka ku nool qurbaha inay taageeraan dadaalkiisa ku aaddan sidii uu dhaqaalaha u beddeli lahaa ugana qaadi lahaa dalka heerka Adduunka Saddexaad una gaarsiin lahaa horyaalka waddamada horumaray.
Madaxweynaha ayaa sheegay in qurba joogta Kenya, oo sannadkii hore soo xareeyay 650 bilyan oo shillinka dalka ah ay door weyn ka ciyaaraan horumarinta kobaca dalka.
Madaxweynaha ayaa fiidnimadii xalay kulan la qaatay Kenyaanka ku nool dalka Qatar kulankaas oo ay ku wehliyeen dhowr wasiir iyo xoghayayaal uu horkacaayay madaxa golaha wasiirada Musalia Mudavadi.
Waxaa uu xusay in Kenyaanka lagu amaano laguna aqoonsado anshaxooda shaqo ee wanaagsan ee adduunka oo dhan, taasoo ah sifa uu sheegay in loo isticmaalo horumarinta dalka.
Madaxweynaha ayaa kulanka ka sheegay inuu la kulmay Raa’iisul Wasaarihii hore ee geeriyooday Raila Odinga iyo Madaxweynihii 4-aad ee dalka Uhuru Kenyatta, waxaa uuna la wadaagay aragtidiisa ku aaddan sida si wanaagsan loogu horumarin karo dalka.
Waxaa uu qiimeeyay kulanka horumarka ee gudaha dalka, isagoo sheegay in Kenya ay sameyneyso horumar la taaban karo oo ka dhan ah dhammaan qaybaha dhaqaalaha.
Madaxweynaha ayaa sheegay inuu ku faraxsan yahay inuu arko dad badan oo Kenyaan ah oo ka shaqeynaya Qatar oo kasbanaya nolol maalmeedkooda si ay naftooda iyo qoysaskooda ugu taageeraan.
Waxaa uu xusay in dowladda ay dib u eegis ku sameyn doonto kharashka dib loogu dirayo lacagta dalka, taas oo hadda u dhaxaysa 5 iyo 7 boqolkiiba lacagta la dirayo.
Madaxweynaha ayaa ku ammaanay Waaxda Arrimaha Dibadda iyo Qurbajoogta, oo ay hoggaaminayso xoghaye Rosline Njogu, inay abuurtay xiriir wanaagsan oo u dhexeeya dadka Kenyaanka ah ee qurbajoogta ah iyo dowladda iyada oo loo marayo ka-qaybgal firfircoon.
Mr Mudavadi ayaa dhankiisa ku ammaanay Kenyaanka qurbajoogta ah inay door muhiim ah ka qaateen xasilinta dhaqaalaha waddanka, waxaa uuna ku ammaanay inay waajibaadkooda dibadda si taxaddar leh u guteen.
Dr Cumar Faarax oo ah guddoomiyaha Kenyaanka ku nool Qatar, ayaa sheegay inay diyaar u yihiin inay la shaqeeyaan dowladda si loo horumariyo kobaca dhaqaalaha ee dalka.
