Afhayeenka Dowladda Dhexe Isaac Mwaura ayaa ugu baaqay Kenyaanka inay si weyn uga soo qayb galaan dabaaldegyada Maalinta Jamhuri Day ee maanta ka dhici doona Garoonka Nyayo ee magaalada Nairobi.
Waxaa uu sheegay in munaasabadda ay ka soo muuqan doonaan Ciidamada Difaaca dalka ee KDF-ta, bandhigyada dhaqamada iyo madadaalada muujinaya kala duwanaanshaha dalka.
Waxaa uu xusay in Madaxweyne William Ruto la filayo inuu khudbad muhiim ah ka jeediyo xafladda qaran, isagoo diiradda saaraya guulaha waddanka iyo dadaallada horumarineed ee socda.
Mwaura ayaa sidoo kale bixiyay warbixin ku saabsan howlaha la qabtay intii lagu jiray Toddobaadka Mawduuca ee Maalinta Jamhuri Day ee sanadkan, kaas oo socday 8-da illa11-kii bishan oo shalay eheed oo cinwaankiisu ahaa “Dalxiiska, Duurjoogta, Kulamada, Dhiirigelinta, Shirarka iyo Bandhigyada (MICE).”
Sida laga soo xigtay Mwaura, waaxda MICE ayaa sii waddaa inay taageerto warshadaha muhiimka ah sida duulista hawada, soo dhawaynta, tafaariiqda, iyo dhaqaalaha ballaaran.
Waxaa uu xusay in isku xirka dalka, awoodda hoteellada ee sii kordheysa, kaabayaasha dijitaalka ah iyo tas hiilaadka sida Xarunta Shirarka Caalamiga ah ee Kenyatta (KICC) ay weli muhiim u yihiin soo jiidashada dalxiiska ganacsiga iyo maalgashiga shisheeye.
