Wasaaradda Arrimaha Dibadda ee Maraykanka ayaa cunaqabatayn ku soo rogtay saddex sarkaal oo sare oo ka tirsan ciidanka la yiraahdo RSF ee dalka Suudaan, ka dib markii lagu eedeeyay inay door ku lahaayeen xasuuq, dilal salka ku haya qabiil, jirdil, gaajo, iyo tacaddiyo baahsan oo dhanka galmada ah oo ka dhacay magaalada El Fasher.
War qoraal ah oo soo baxay Jimcihii, La-taliyaha Sare ee Arrimaha Carabta iyo Afrika, Massad Boulos, ayaa sheegay in tallaabooyinkan ay sidoo kale ku jiraan xayiraado lagu soo rogay sarkaal afaraad oo ku lug leh xadgudubyo baahsan oo ka dhan ah xuquuqda aadanaha inta uu socdo dagaalka Suudaan.
“Dambiyadani waxay kala firdhiyeen qoysas, waxay barakiciyeen beelo dhan, waxayna sii xumeeyeen dhibaatada dadka Suudaan,” ayuu yiri Boulos.
Wuxuu ku daray in cunaqabatayntan cusub ay qayb ka tahay tallaabooyinkii hore ee Maraykanku ku beegsanayay shakhsiyaadka iyo kooxaha lagu eedeeyay inay hurinayaan rabshadaha iyo xasillooni-darrada dalka.
Qoraalka ayaa sidoo kale lagu sheegay in “Maraykanku uusan marnaba u dulqaadan doonin naxariis-darrada noocaas ah iyo xadgudubyada kale ee waaweyn xaalad kasta ha ahaatee.”
Washington waxay ku boorisay dhammaan dhinacyada isku haya dagaalka inay si degdeg ah u aqbalaan xabbad-joog bini’aadanimo oo aan shuruud ku xirnayn, taas oo ay taageerayso hay’ad ay Qaramada Midoobay dhistay si gargaarka naf-badbaadinta ah u gaaro dadka rayidka ah, loona furo fursad wadahadal.
Wuxuu hadalkiisa kusoo xiray: “Dadka Suudaan waxay mudan yihiin ammaan, sharaf, iyo mustaqbal ka caagan cabsi—waxaanan garab taagan nahay iyaga sidii ay u heli lahaayeen nabadda waarta ee ay mudan yihiin.”
