Madaxweynaha Jabuuti Ismaaciil Cumar Geelle ayaa si rasmi ah ugu dhawaaqay inuu mar kale u tartamayo doorashada madaxtinimo ee dalkaas ee lagu wado in ay dhacdo bisha April ee sanadka 2026-ka, taas oo noqon doonta muddadiisii lixaad ee uu xukunka u tartamo, kaddib markii baarlamaanka Jabuuti uu dhawaan meesha ka saaray xayiraaddii da’da iyo xaddidnaantii muddada xil haynta ee dastuurka.
Madaxweynaha oo 77 sano jirka ah ayaa sheegay in uu aqbalay codsi kaga yimid xisbiga talada haya ee Ururka Isbahaysiga Horumarka Dadweynaha (RPP), xilli lagu guda jiray shirweyne gaar ah oo xisbigu ku qabtay Qasriga Dadweynaha ee magaalada Jabuuti. Waxaa uu sheegay in xisbigu ka codsaday in uu mar lixaad u tartamo madaxnimada dalka Jabuuti.
Geelle, oo xilka hayay tan iyo 1999, ayaa ballanqaaday inuu sii wadi doono siyaasaddiisa oo uu sheegay in ay ku dhisantahay “midnimo, xasillooni, iyo horumar” isagoo sheegay in dalku wajahayo caqabado caalami ah oo u baahan hoggaan adag.
