Madaxweynaha dalka William Ruto ayaa aqalka madaxtooyada ee State House ee magaalada Nairobi kula kulmay boqorka Lesotho King Letsie III .
Waxaa uu hoosta ka xarriiqay in ay yeesheen wada hadallo lagu xoojinaya iskaashiga labo geesoodka ee Kenya iyo Lesotho.
Ruto ayaa qoraal ku sheegay in wasiirrada arrimaha dibadda ee labada waddan la faray in ay qaban qaabiyaan kulanka guddiga iskudhafka ah ee iskaashiga dhinacyada kala duwan.
Waxay labada mas’uul sidoo kale ka wada hadleen barnaamijyada quudinta ardayda ee dugsiyada Kenya iyo Lesotho.
Madaxweynaha ayaa xusay in ay wada qireen saameynta wanaagsan ee barnaamijyadan ay ku yeesheen waxbarashada sida tirada carruurta tagaya xarumaha tacliinta oo korortay , waxbarashada oo soo hagaagtay iyo xoojinta caafimaadka iyo nafaqada ardayda.
Dhanka kale, madaxweynaha William Ruto ayaa aqoonsi dowladeed oo rasmi ah siiyay jaamacadda Riara University.
Hoggaamiyaha dalka ayaa sheegay in ay ka go’an tahay taageeridda jaamacadaha iyo dhammaan heerarka kale ee waxbarashada.
Waxaa uu intaasi ku daray in ay sii wadi doonaan adeegsiga siyaasad jaamacadaha looga dhigaya halbowlaha cilmi baarista iyo hal-abuurka.
