Dowladda Kenya waxay ku amartay hay’adaha amniga inay si degdeg ah u baaraan dhacdo lagu eedeeyay muwaadin Ruush ah inuu si qarsoodi ah u duubay oo uu faafiyay sawirro haween Kenyan ah iyagoon ogolaansho ka haysan.
War-saxaafadeed ay soo saartay, Xoghayaha arrimaha Jinsiga Hanna Cheptumo ayaa cambaareysay dhacdada iyadoo ku tilmaantay nooc ka mid ah rabshadaha ku salaysan jinsiga ee ay fududeysay tiknoolajiyadda oo halis gelinaya badbaadada haweenka iyo gabdhaha.
“Dowlad ahaan, waxaan u aragnaa xadgudubyada noocaas ah inay yihiin falal dambiyeed khatar ku ah qaab-dhismeedka bulshada, kaas oo ku salaysan ixtiraamka, sharafta aadanaha, iyo ilaalinta dadka nugul,” ayay tiri Cheptumo
Wasiirka Arrimaha Dibadda ayaa sheegay in Dowladdu ay bilawday jawaab celin dowladeed, iyadoo hay’adaha la faray inay si degdeg ah u raadiyaan eedeysanaha, oo ay ku jirto iskaashiga hay’adaha amniga ee caalamiga ah.
“Qof kasta oo lagu helo dambi wuxuu wajihi doonaa awood buuxda oo sharciga Kenya ah oo hoos timaada Xeerka Ciqaabta, Xeerka Isticmaalka Xun ee Kumbuyuutarka iyo Dembiyada Internetka, iyo dhammaan xeerarka khuseeya ee ilaalinaya haweenka iyo carruurta,” ayay tiri.
Cheptumo waxay ku dhawaaqday qorshayaal lagu xoojinayo qaab-dhismeedka siyaasadda qaranka ee ku saabsan badbaadada internetka iyo dhaqanka dijitaalka ah.
