Madaxweynaha dalka Dr. William Ruto ayaa magaalada Washington ee Maraykanka kula kulmay agaasimaha guud ee shirkadda caalamiga ee maaliyadda ee IFC Makhtar Diop.
Ruto ayaa sheegay in qaabka ay dowladdu u wajahaysa maalgelinta horumarka sida dhisidda sanduuqa kaabayaasha uu yahay mid ay daneynayaan saaxiibbada Kenya.
Waxaa uu qoraal ku sheegay in habkan uu dardargelin doono hadafyada qaran ee horumarka.
Ruto ayaa tilmaamay in ay soo dhaweynayaan kalsoonida ay IFC ku qabto qorshaha lagu aasaasaya sanduuqa kaabayaasha iyo sida ay u daneynaysa in ay maalgeliso.
Waxaa uu qorshuhu yahay in horraanta sanadka 2026-ka uu Kenya soo gaaro wafdiga IFC oo uu hoggaaminaya ku xigeenka madaxa warshadaha ee shirkaddan Mohamed Gouled.
Labada dowladood ee Kenya iyo Maraykanka ayaa sii wadi doono wada hadallada dhanka tamarta iyo maalgelinta kaabayaasha gaar ahaan casriyeynta gagida caalamiga ee diyaaradaha ee JKIA ee magaalada Nairobi, ballaarinta waddooyinka waawayn iyo soo saaridda tamarta noocyadeeda kala duwan.
Madaxweynaha dalka William Ruto ayaa sidoo kale wada hadal la yeeshay madaxa fulinta ee shirkadda Maraykanka u qaabilsan maaliyadda horumarka caalamiga ee (DFC), Ben Black.
Waxaa uu xusay in shirkaddan ay Kenya kala shaqeyn doonto dhinacyada helidda cunnada, kaabayaasha, tamarta iyo ICT-da.
DFC ayaa sidoo kale oggolaatay in laga billaabo bisha 1-aad ee sanadka soo socdo ay Kenya u soo dirto wakiil ku matalaya oo uu fadhigiisu yahay magaalada Nairobi.
