Taliyaha Guud ee Booliiska dalka Douglas Kanja ayaa sheegay in Adeegga Qaran ee Booliiska uu ka shaqeynayo sidii loo xiri lahaa meelaha ka bannaan howlgalladiisa iyadoo la xoojinayo isla xisaabtanka iyo tababarka dalka oo dhan si loo soo afjaro kiisaska naxariis darrada ah ee booliiska.
Kanja ayaa sidaas yiri isagoo qiraya kalsooni darrada sii kordheysa ee dadweynaha ee ku aaddan dhimashada ka dhacda xabsiyada booliiska, toogashada dadka rayidka ah ee aan hubaysnayn iyo maaraynta dibadbaxyadii sannadkii hore.
Wareysi gaar ah oo uu siiyay talefishinka maxalliga ah ee NTV, Kanja ayaa qiray in dadweynaha ay qabaan walaac sharci ah oo ku saabsan dhacdooyinkan, isagoo ku adkeystay in saraakiisha “ay ahayd inay si wanaagsan u maareyaan dibadbaxyada” iyo in adeegga uu qaadayo tallaabooyin ula kac ah si looga hortago guuldarrooyinka la midka ah.
Kanja ayaa sheegay in adeegga uu mudnaanta siinayo dib u habaynta loogu talagalay in lagu horumariyo xirfadda saldhigyada booliiska, kuwaas oo uu ku tilmaamay “xarumaha ugu sarreeya” ee booliiska. Tababarka, ayuu raaciyay, ayaa weli ah udub dhexaadka isbeddelkan.
Qiyaastii 45 boqolkiiba saraakiisha booliiska ayaa qaatay tababar heer sare ah, tiro uu ku adkeysanayo inay tahay in la kordhiyo si adeegga uu u daboolo filashooyinka dadweynaha.
Mudaaharaadyadii sannadkii hore, oo soo jiitay dhaleeceyn ballaaran oo ku saabsan isticmaalka awoodda xad dhaafka ah ee booliiska ayuu Kanja qiray in jawaabta booliiska ay eheed mid gaabis ah.
Waxaa uu sheegay in saraakiisha laga filayo inay fududeeyaan dibadbaxyada sharciga ah sida ku xusan Qodobka 37-aad ee Dastuurka, balse caqabado ayaa soo baxa marka dibadbaxyada ay isu beddelaan rabshado ama ay ka faa’iidaystaan dad kiciyafowdada.
Taliyaha ayaa sidoo kale meesha ka saaray sheegashooyinka ah in booliiska ay ka dambeeyaan afduubyada dhawaan laga soo sheegay dalka oo dhan, isagoo sheegay in ficillada noocaas ah aysan qayb ka ahayn waajibaadka sarkaal kasta.
Waxaa uu ku adkaystay in adeegga uu si adag ugu shaqeeyo sharciga isagoo ka digay in qof kasta, oo ay ku jiraan saraakiisha, oo lagu helo inuu gacan ka geysanayo ama ka qayb qaadanayo afduubyada, ay wajihi doonaan “tallaabo degdeg ah oo adag.”
In kasta oo dhaleecaynta jirto, Kanja ayaa difaacay waxqabadka guud ee Adeegga Qaran ee Booliiska.
Si kastaba ha ahaatee, Kanja ayaa qiray in dib u dhiska kalsoonida dadweynaha ay u baahan doonto isku dheelitirnaan, hufnaan iyo dib u habayn joogto ah.
