Barasaabka dowlad deegaanka Kakamega Fernandes Barasa ayaa amray baaritaan degdeg ah oo dhamaystiran ka dib markii rabshado ka dhaceen kulan dadweyne oo Khamiistii dhacay, kaas oo galaaftay nolosha saddex qof, halka 18 kalena ay si xun u dhaawacmeen.
Dhacdada ayaa ka dhacday Emusali oo ku taal Degmada Ikolomani intii lagu jiray madal ay Hay’adda Qaran ee Maareynta Deegaanka (NEMA) isugu yeertay dadweynaha si looga hadlo mashruuca macdan qodista dhulka hoostiisa mara ee Isulu iyo Bushangala.
Guddoomiye Barasa ayaa xaqiijiyay dhimashada iyo dhaawacyada, isagoo xusay in dadka ku wax yeeloobay shaqaaqada ay ka mid ahaayeen saraakiil booliis iyo saxafiyiin. Hanti ayaa sidoo kale la sheegay in la burburiyay oo la xaday intii lagu jiray fowdada.
Barasaabka Kakamega ayaa tacsi tiiraanyo leh u diray qoysaska dadkii ku dhintay, isagoo u rajeeyay kuwa dhaawacmay inay si degdeg ah u bogsadaan.
Waxaa uu codsi degdeg ah u diray dadka deegaanka, hoggaamiyeyaasha maxalliga ah, iyo daneeyayaasha si loo helo deganaansho, miyir qab, iyo is xakamayn, isagoo ku nuuxnuuxsaday in khilaaf uusan waligiis horseedin khasaaro naf ama burbur hanti.
Guddoomiyaha ayaa si toos ah u faray hay’adaha ammaanka inay sameeyaan baaritaan degdeg ah oo dhammaystiran si loo ogaado sababta keentay dhacdada iyo in la hubiyo in caddaaladda la fuliyo.
Mr. Barasa ayaa xaqiijiyay in amniga la xoojiyay guud ahaan Emusali iyo Degmada Ikolomani si loo soo celiyo kala dambeynta loona ilaaliyo nolosha iyo hantida.
