Waxaa la dhaariyay guddoomiyaha iyo xubnaha guddi loo xil saaray inuu baaritaano ku sameeyo garsoore Maxamad Nuur Kuulow oo ka howlgalo maxkamadda arrimaha deegaanka iyo dhulalka.
Tani ayaa timid ka dib markii guddiga adeegga waaxda cadaaladda ee dalka ee JSC loo gudbiyay ilaa afar dacwadood.
Cabashooyinkan ayaa lagu doonaya inuu xafiiska banneeyo garsooraha.
Madaxa cadaaladda ee dalka garsoore Martha Koome oo guddoominaysay munaasabadii lagu dhaariyay guddiga ayaa kula dardaarantay inay waajibaadkooda u gutaan si waafaqsan xeerarka dastuuriga ah.
Waxaa guddiga baaritaannada ku sameynaya xaakinka guddoominaya garsoore Patrick Kiage oo ka howlgalo maxkamadda racfaanka ee dalka.
Waxaa dhanka talasiinta ku hoggaaminaysa garyaqaan sare Dorcas Oduor.
Garsoore Maxamad Nuur Kuulow ayaa ku eedeysan inuu marar badan dib u dhigay ama uu ku guul dareystay inuu go’aamo ka soo saaro kiisas kala duwan xilli uu ka howlgalayay maxkamadda ismaamulka Narok.
