Eliud Owalo ayaa iska casilay xilkiisii Ku-xigeenka Madaxa Shaqaalaha ee Bixinta iyo adeegyada Hufnaanta ah ee Dowladda, isagoo ku sababeeyay inuu doonayo in uu u tartamo xilka madaxweynenimo ee Doorashada Guud sanadka 2027.
Sarkaalka dowladda ayaa ku dhawaaqay iscasilaadiisa degdega ah ka dib markii uu si cad u sheegay inuu damacsan yahay inuu la tartamo madaxweynaha hadda xilka haya William Ruto.
“Kadib markii aan ku dhawaaqay inaan doonayo inaan u tartamo xilka Madaxweynaha Jamhuuriyadda Kenya sanadka 2027, jagadaydii Ku-xigeenka Madaxa Shaqaalaha, Bixinta iyo adeegyada Hufnaanta Dowladda hadda ma sii socon karto.
Sidaa darteed waan iska casilay jagadaas si degdeg ah,” ayuu Owalo ku qoray qoraal uu soo dhigay baraha bulshada.
Madaxweyne Ruto, wuxuu Owalo u xilsaaray isku-dubaridka waxqabadka dowladda iyo hubinta hufnaanta howlaha kala duwan ee dowladda.
Owalo wuxuu ka soo qayb galay doorashooyinkii hore wuxuuna ka soo shaqeeyay jagooyin kala duwan, oo ay ku jirto muddadii uu ahaa wasiirka wasaaradda Warfaafinta, Isgaarsiinta, iyo Dhaqaalaha Dijitaalka ah.
