Guddiga Anshaxa iyo La dagaallanka Musuqmaasuqa (EACC), oo kaashanaya Hay’adda Baarista Federaalka ee Maraykanka (FBI), ayaa daah furay xaruun casri oo wareysi ah, taas oo loogu talagalay xoojinta baaritaannada iyo dardargelinta dagaalka ka dhanka ah musuqmaasuqa.
Xaruuntan oo tiknoolajiyad casri leh ayaa lagu hirgeliyay taageero farsamo iyo mid dhaqaale oo ka timid FBI, Safaaradda Maraykanka ee Kenya, iyo Xafiiska Arrimaha Caalamiga ah ee La dagaallanka Daroogada iyo Fulinta Sharciga (INL).
Munaasabadda furitaanka, Agaasimaha Guud ee EACC, Cabdi Maxamuud, ayaa ammaanay iskaashiga jira, isagoo u mahadceliyay hay’adaha la shaqeeyay. Waxaa uu sheegay in xaruuntan ay tahay tallaabo weyn oo lagu casriyeynayo hababka baarista ee guddiga, isla markaana ay kor u qaadi doonto hufnaanta iyo xirfadda shaqada.
Maxamuud ayaa sidoo kale xusay in taageerada joogtada ah ee bah wadaagta ay door muhiim ah ka qaadaneyso horumarinta anshaxa, daah furnaanta, isla xisaabtanka, iyo maamul wanaagga.
Dhankeeda, Safiirka ku meelgaarka ah ee Safaaradda Maraykanka, Susan Burns, ayaa sheegtay in xaruuntan cusub ay si toos ah u xoojin doonto awoodda EACC ee ku aaddan qabashada baaritaanno xirfad leh oo wax ku ool ah, iyadoo la adkeynayo muhiimadda ay leedahay la dagaallanka musuqmaasuqa si loo helo fulin sharci oo hufan.
Sidoo kale, Agaasimaha INL, Maureen Mimnaugh, ayaa mar kale xaqiijisay sida ay uga go’an tahay hay’adda INL inay sii waddo iskaashiga ay la leedahay EACC, iyadoo xustay in horumarka muddada fog ee Kenya uu si dhow ugu xiran yahay guusha guddiga ee fulinta waajibaadkiisa.
