Raa’iisul Wasaarihii hore ee dalka Raila Odinga ayaa difaacay soo jeedintiisa ku aadan samaynta shirweyne qaran si loo jeexo waddo cusub oo loo maro ka-qaybgal bulsho oo wadareed.
Isagoo ka hadlayay xafladdii aaska ee Alison Sigei ee ka dhacday dowlad deegaanka Bomet hoggaamiyaha ODM ayaa waxaa uu meesha ka saaray kuwa ka soo horjeeda samaynta shirweyne qaran, taasoo uu sheegay inay muhiim u noqon doonto qaabaynta koorsada cusub ee loo dhan yahay ee dalka.
Odinga ayaa soo bandhigay waxa uu sheegay in ay noqon doonto qaabka ugu haboon, halkaas oo 40 qof laga soo xuli doono 47-da gobol.
Sidoo kale, waxaa xaflada ka hadlay madaxda xulafada la ah dowladda kuwaasoo ugu baaqay Kenyaanka inay ka fogaadaan siyaasadda qabyaaladda.
Hoggaamiyayaasha xulafada la ah dowladda ayaa weerar afka ah ku qaaday madaxweyne ku xigeenkii hore ee dalka Rigathi Gachagua iyagoo uga digay Kenyaanka inay qaadanin hadladiisa qabyaaladda.
Madaxda ayaa sidoo kale ku baaqay in la sameeyo isbaheysi siyaasadeed oo xaqiijin doona in madaxweyne William Ruto uu ku guuleysto xilka madaxtinimada mar labaad.
