Xildhibaanka deegaanka Saboti ee ismaamulka Trans-Nzoia Caleb Amisi ayaa eedda dusha ka saaray madaxa wasiirrada ahna wasiirka arrimaha dibadda ee dalka Musalia Mudavadi iyo Agaasimaha Guud ee Adeegga Qaran ee Sirdoonka (NIS) Nuurdiin Xaaji.
Waxaa uu ku doodaya in Mudavadi iyo Nuurdiin ay sabab u ahaayeen guul darradii Raila Odinga ee xilka Guddoomiyaha Guddiga Midowga Afrika (AUC) .
Xildhibaan Amisi ayaa aaminsan in labadan mas’uul ay iska casilaan xilalkooda.
Waxaa uu tilmaamay inay marin habaabiyeen Ra’iisul Wasaarihii hore ee waddanka oo ay ku guuldarreysteen in ay soo gudbiyaan xogta sirta ah ee suurtagalnimada uu ku guuleeysan karo Raila.
Sidaa darteed waxaa uu xusay in labadooduba ay tahay in lagu eedeeyo sida uu qoraalkiisa u dhigay “been u sheegidda iyo in ay Raila ay u horsedeen khasaare uusan u qalmin.
Odinga ayaa looga guulaystay tartanka doorashada oo ka koobnaa 7 wareeg oo codbixin qarsoodi ah oo shalay ka dhacay magaalada Addis Ababa ee dalka Itoobiya.
Dhanka kale, hoggaamiyayaasha siyaasadda oo uu ugu horreeyo madaxweyne ku xigeenka dalka Prof. Kithure Kindiki, ayaa bogaadiyay sida uu Odinga uga qayb qaatay tartanka, waxayna ku bogaadiyeen madaxweyne William Ruto inuu taageeray ololihiisa.
