Waxaa laga cabsi qabaa in iska horimaad uu ka dhaco ismaamulka Kakamega ka hor isu soo-bax qorsheysan oo ay dhigayaan garab ka tirsan xisbiga ODM oo xulufo la ah Senator-ka Nairobi, Edwin Sifuna, ka dib markii boolisku ay sare u qaadeen walaaca dhanka ammaanka ah ayna ka digeen nooc kasta oo fowdo ah.
Taliyaha Booliska Gobolka Galbeedka, Isaak Mahoud, ayaa sheegay in maamulka aan si rasmi ah loogu soo wargelin Isu soo-baxa qorsheysan maalinta Sabtida ee ka dhacaya Malemba, isagoo xusay in xogta ku saabsan munaasabadda lagu shaaciyay oo kaliya baraha bulshada.
Wuxuu ku adkeeyay in xafiiskiisa aan loo soo gudbin wax codsi rasmi ah oo ku saabsan caawinaadda booliska, balse wuxuu ballan-qaaday in ammaan la sugi doono haddii loo baahdo.
Taliyaha gobolka ayaa uga digay in boolisku aysan u dulqaadan doonin wax kasta oo sharci darro ah, isagoo sheegay in saraakiishu ay diyaar u yihiin inay adeegsadaan dhammaan hababka sharciga ah si loo xaqiijiyo kala dambeynta.
Mahoud ayaa intaas ku daray in hay’adaha ammaanku ay heleen xog sirdoon oo sheegaysa in qaar ka mid ah dadka qorsheynaya inay ka qaybgalaan dibad-baxa ay noqon karaan kuwo hubeysan.
Wuxuu kaloo sheegay inuu haysto ciidan ku filan oo maareyn kara xaaladda, haddii loo baahdona uu codsan karo ciidamo dheeri ah, oo ay ku jirto in diyaarada lagu soo daabulo.
Hadalladan ayaa yimid ka dib markii gaari xamuul ah oo ay leeyihiin garabka Linda Mwananchi ee ODM oo ay hoggaamiyaan Sifuna, Babu Owino, James Orengo iyo kuwa kale dhagaxaan lagu tuuray isagoo ku sii jeeday Kakamega si uu uga qayb galo isu-baxa Sabtida ee loo qorsheeyay Febraayo 21.
Sida ku cad muuqaallo uu wadaagay Sifuna, gaariga ayaa qayb ka ahaa kolonyo u socotay ismaamulka Kakamega markii lagu weeraray xarunta ganacsiga ee Kona Mbaya subaxnimadii Jimcaha.
Sifuna ayaa horay uga digay wax kasta oo lagu carqaladeynayo munaasabadda, isagoo sheegay inuu si rasmi ah u ogeysiiyay OCPD-ga Kakamega, uuna ogeysiiska dibad-baxa qorsheysan kula wadaagay Wasiirka Gudaha, Kipchumba Murkomen, dhanka WhatsApp-ka.
Axaddii la soo dhaafay, rabshado ayaa ka dhashay Isu soo-baxa ay soo qabanqaabiyeen kooxda Sifuna ee ka dhacay Kitengela, iyadoo Wasiirka Gudaha Murkomen uu sheegay in hay’adaha ammaanka aan lagu wargelin kulanka si ay ammaan u bixiyaan.
Sifuna ayaa tan iyo markaas meesha ka saaray hadallada Murkomen, isagoo ku adkeysanaya in booliska si habboon loogu wargeliyay dibad-baxa.
