Xildhibaanka deegaanka Bariga Embakasi Babu Owino ayaa si cad u diiday inuu u hoggaansamo wicitaan uga yimid saraakiil ka tirsan Waaxda Dembi Baarista ee gobolka galbeed, kuwaas oo doonayay inay su’aalo ka weydiiyaan isu soo baxyadii Linda Mwananchi ee ka dhacay deegaannada Amalemba iyo Mbale.
Warqad uu u diray agaasimaha gobolka, Owino ayaa ku eedeeyay saraakiisha inay isku dayayaan cabsi gelin iyo cadaadis siyaasadeed, isagoo sheegay in Kakamega aysan ahayn meel ku habboon in lagu qabto arrintan, isla markaana ku booriyay inay ilaaliyaan dhaarta xilka iyo sharciga dalka.
Waxaa uu sidoo kale su’aal geliyay adeegsiga sharciga dembiyada tiknoolajiyadda, isagoo ka digay in aan loo adeegsan in lagu cabburiyo codadka siyaasadeed. Waxaa uu intaas ku daray in haddii wax dacwad ah jirto, lagu wajaho magaalada Nairobi, halkii Kakamega lagu qaban lahaa.
Dhanka kale, Wasiirka Arrimaha Gudaha Kipchumba Murkomen ayaa beeniyay in booliiska ay ku lug lahaayeen sunta dadka ka ilmeysiisa ee lagu tuuray isu soo bax ka dhacay Kakamega oo uu ka hadlayay Edwin Sifuna. Waxaa uu sheegay in baaritaan uu socdo si loo helo qofka falkaas ka dambeeyay, isagoo sidoo kale ku eedeeyay siyaasiyiin inay kicinayaan rabshado si ay u sumcad xumeeyaan dowladda.
