Dowladda Maraykanka ayaa sheegtay in ciidamada sida militariga u tababaran ee RSF ee dalka Suudaan ay gaysteen xasuuq shacab.
Xoghayaha waaxda arrimaha dibadda ee Maraykanka Antony Blinken ayaa hoosta ka xarriiqay in cunaqabateyn lagu soo rogay hoggaamiyaha saraakiishan Maxamad Xamdan Dagalo.
Go’aankan ayaa lagu saleeyay in taliyaha iyo ciidamada ka amar qaata ay gabood-fallo joogto ah kula kaceen shacabka Suudaan.
Kooxdan ayaa lagu eedeyay in ay dilal u gaysatay ragga iyo wiilasha oo ayna faraxumeeyeen haweenka iyo gabdhaha ka soo jeeda qowmiyado gaar ah.
Maraykanka ayaa sidoo kale cunaqabateyn saaray 7 shirkadood iyo hal qof oo lala xiriirinaya RSF.
Heshiiska qaramada midoobay ee ka hor tagga iyo isu-ciqaabidda dembiga xasuuqa oo la ansixiyay ka dib dagaalkii labaad ee dunida ayaa qeexaya in falalka la gaysto iyadoo ujeeddada laga leeyahay ay tahay burburin buuxda ama qayb ah kuwaaso ka dhan ah qaran, qowmiyad mise koox diimeed ay ka dhigan yihiin xasuuq.
Waxaa tan iyo bishii Afaraad ee sanadkii 2023-kii dalka Suudaan ka taagan khilaaf u dhexeeya ciidamada difaaca ee waddankaasi iyo saraakiisha RSF-ta.
Tobanaan kun oo qof ayaa dagaallada ku dhintay waxaana gudaha Suudaan ku barakacay in ka badan 8 milyan oo qof.
Qaramada Midoobay ayaa laga soo xigtay in ugu yaraan 30 milyan oo qof oo ku nool Suudaan oo kala bar carruur ah ay u baahan yihiin gargaar baniaadannimo saameynta ka dhalatay iskudhacyada labada dhinac awgeed.
