Waxaa lagu soo warramayaa in 5 qof oo uu ilmo yar ku jira ay dhinteen ka dib markii uu ku soo dumay darbi ay gabaad ka dhigayeen xilli uu roob da’ayay.
Dhacdadan ayaa duhurnimadii maanta laga soo tabiyay xaafadda Miritini ee ka tirsan deegaan baarlamaaneedka Jomvu ee ismaamulka Mombasa.
Wararka ayaa intaasi ku daraya in saddex qof ay dhacdadan ku dhaawacmeen islamarkaana haatan lagu dabiibaya isbitaal ku yaalla magaalada Mombasa.
Shanta qof ee dhintay ayaa ka qayb galayay munaasabad aas xilli uu roob billowday, waxayna gabaad ka dhigteen darbiga ku soo dumay.
Dadka dhintay ayaa isugu jiray ilmo yar iyo saddex haween ah kuwaas isla goobta ku geeriyooday halka qofka shanaad uu dhintay xilli lala tacaalayay dhaawac culus oo soo gaaray.
Goobjoogayaal ayaa warbaahinta uga warramay sida ay wax u dhaceen.
