Booliiska ayaa billaabay baaritaanno ku aaadan dilka madaxii shaqaalaha ee shirkadda gaarka ah ee bixisa adeegyada amniga ee Wells Fargo Willis Ayieko.
Ninkan oo la waayay maalinkii Jimcaha ee toddobaadkii hore ayaa shalay meydkiisa laga helay deegaanka Gem, ee ismaamulka Siaya.
Wararka ayaa intaasi ku daraya in meydka Ayieko uu gacmaha ka xirnaa iyadoo laga soo saaray meel biyo mareen ah.
Ayieko ayaa markii ugu dambeysay la arkay maalinkii Jimcaha ee 18-kii bishan ka dib markii uu ka qayb galay aas ka dhacay deegaanka Gem.
22-kii bishan ayay ahayd markii baabuur uu laahaa mas’uulkan laga helay meel u dhow kaalin shidaal oo ku taalla deegaanka Sabatia ee ismaamulka Vihiga.
Taliyaha booliiska ee deegaanka Gem Charles Wafula ayaa xusay in Mr. Ayieko laga shakisan yahay in la afduubtay kadibna la dilay.
