Faahfaahino dheeraad ah ayaa laga helayaa dhacdo argagax leh oo xalay ka dhacday gudaha degmada Kaaraan ee gobolka Banaadir, taas oo ka dhalatay dil wadareed loo gaystay gabadh iyo hooyadeed.
Wararka ayaa sheegaya in dilkan uu gaystay askari ka tirsan ciidamada milatariga Soomaaliya oo weerar ku soo qaaday qoyskan oo deggan xaafadda Faanoole ee degmada Kaaraan.
Ilo wareedyo dadka deegaanka ah ayaa inoo sheegay in askariga uu horay u qabi jiray gabadha, ayna carruur u dhashay balse uu soo kala dhex galay khilaaf, kaas oo ugu dambeyn sababay inuu askariga gaysto falkan argagaxa leh.
Goobjoogayaal ayaa sheegay in xilliga uu dhacayay falkan ay bannaanka gurigooda fadhiyeen gabadha iyo hooyadeed, uuna hal mar rasaas ooda kaga qaaday , waxayna ku geeriyoodeen isla goobta.
Nasteexo iyo hooyadeed Muslimo ayaa waxaa lagu kala magacaabi jiray Nasteexo Nuur Dable iyo Muslimo Macallin Xasan, waxaana goobta ka baxsaday askariga dilka gaystay.
Falkan ayaa sidoo kale argagax ku reebay dadka deegaanka oo si wayn uga naxay dilka loo gaystay gabadha iyo hooyadeed oo ay muddo dheer ahaayeen dad daris ah.
