Madaxa xisbiga Wiper ,Kalonzo Musyoka ayaa dhigiisa ODM Raila Odinga ka dalbaday inuu 9-ka bisha Siddeedaad ee sanadkan garab ku siiyo hammigiisa ah inuu qabto hoggaanka ugu sarreeya wadanka.
Waxaa uu maanta soo bandhigay heshiis ay horay u gaareen isaga iyo ra’iisul wasaarihii hore ee dalka.
Mr. Musyoka ayaa hoosta ka xarriiqay in heshiiskaasi uu dhigayay in haddii isbeheysiga NASA uu ku guulaysto doorashada 2017-kii ama uu ku guul dareysto labaduba Mr. Odinga uu xilliga codeynta guud ee xigta uu taageeri doono musharraxnimada Musyoka.
Madaxa Wiper ayaa sidoo kale sheegay in isagoo matalaya isbeheysiga OKA uu diyaar u yahay inuu la xaajoodo garabka siyaasadeed ee Azimio si ay heshiis kama dambeys ah u gaaraan.
Hasa ahaate waxaa uu carrabka ku adkeeyay in sanadkan uunan beegsanayn jago ka hooseysa xilka madaxweyne.
