Adeegga qaran ee booliiska ee NPS ayaa bayaan uu soo saaray ku sheegay in la xiray 4 qof oo tuhmaneyaal ah oo lala xiriirinaya dilkii habeennimadii Arbacada loo gaystay xildhibaankii deegaanka Kasipul ee ismaamulka Homa Bay Charles Ong’ondo Were.
Afhayeenka booliiska dalka Muchiri Nyaga ayaa xusay in eedeysanayaasha lagu arkay goobtii ay toogashadi ka dhacday.
Waxaa uu intaasi ku daray in howlgalka la sameeyay iyadoo la adeegsanaya xogo la helay baaritaanno qiimeyn ah ka dib.
Nyaga ayaa sheegay in dambi baarayaasha ay sidoo kale heleen caddeyn muhiim ah oo la xiriirta fal dambiyeedka dhacay iyo dadkii ka dambeeyay.
Waxaa uu hoosta ka xarriiqay in qaar ka mid ah eedeysanayaasha la xiray ay xubno ka yihiin burcadda abaabulan ee loo yaqaano ‘Mjahidin’ oo lala xiriiriyay falal dhac ah oo hub loo adeegsaday kuwaaso laga gaystay xaafadaha Eastlands ee ismaamulka Nairobi sida Pipeline, Umoja, Donholm, Dandora, Kayole, Makadara iyo Jericho.
Afhayeenka booliiska dalka ayaa xaqiijiyay in dambi baarayaasha ay ku dadaalayaan in la ogaado sababtii keentay in la toogto xildhibaankii deegaanka Kasipul iyo in gacanta lagu soo dhigo cid kasta oo ku lug lahayd.
Waxaa uu shacabka ku boorriyay in ay is dejiyaan oo ay ka fogaadaan waxyaabaha aan xaqiiqada ku saleysnayn oo la iska dhaadhiciyo.
Sidoo kale, NPS ayaa cid kasta oo aan si toos ah qayb uga ahayn baaritaannada socdo kula talisay in aynan jeedin hadallo ama faallooyin saameyn kara dadaallada.
Ugu dambeyn, adeegga qaran ee booliiska ee NPS ayaa cid kasta oo haysa xog ku saabsan dilkii Charles Were ka codsaday in ay tagto saldhigga ugu dhow ee booliiska si ay warbixinteeda u gudbiso.
