Afhayeen u hadlay militariga Xuuthiyiinta oo lagu magacaabo Yahya Sarea ayaa sheegay in 24-kii saac ee la soo daafay ay 3 jeer weerar ku qaadeen markabka USS Harry S. Truman oo ku sugnaa Badda Cas.
Markabkan oo laga leeyay dalka Mareykanka ayaa sida ay sheegeen Xuutiyiinta waxaa lagu weeraray gantaalaha nooca loo yaqaan cruise missiles iyo diyaaradaha aan duuliyaha lahayn.
Bayaan uu soo saaray Sarea ayuu kaga dhawaajiyay in weerarada ay qayb ka yihiin howlgalada lagu taageeraayo Falastiniyiinta.
Arbacadii la soo daafay ayay ehed markii madaxweynaha Mareykanka Donald Trump uu shaaca ka qaaday in duqeymaha ay dowladdiisa ku hayso Yemen ay sii soconi doonaan waqti dheer.
Weerarkan ayaa noqonaya kii ugu dambeeyay ee weeraro ay Xuuthiyiintu sheegtaan oo lala beegsado markab laga leeyahay dalka Mareykanka tan iyo markii Mareykanka uu dib u bilaabay duqeymaha cirka ah 15-kii bishii March si ay uga hortagaan weerarada Xuutiyiinta ay la beegsanayaan maraakiibta caalamiga ah ee gobolkaasi.
