Madaxweynaha xafiiska banneynaya ee Somaliland, Muuse Biixi Cabdi, ayaa uu hambalyeeyey madaxweynaha ay dhawaan doorteen shacabka reer Somaliland, Cabdiraxmaan Maxamad Cabdillaahi (Cirro).
Waxaa uu sheegay inuu aqbalay uuna soo dhaweeyey natiijada ku meel gaarka ah ee ka soo baxday guddiga doorashooyinka Somaliland.
Madaxweyne Muuse Biixi Cabdi ayaa u mahadceliyey cid kasta oo ka qayb qaadatay doorashooyinkii madaxtooyada iyo xisbiyada ee Somaliland ka qabsoontay.
Waxaa uu si cad u sheegay inuu aqbalay guusha xisbiga WADDANI ka soo hooyay doorashooyinkii Somaliland ka dhacay.
Ugu dambayntii, waxaa uu taageerayaasha xisbiga KULMIYE ugu baaqay inay u hoggaansamaan natiijada, isaga oo guud ahaanba shacabka reer Somaliland ka codsaday in lala shaqeeyo madaxweynaha la doortay.
