Ciidamada ammaanka ayaa shaaciyay inay heleen labo qori halka dib loo soo celiyay ilaa toddobo neef oo lo’o ah oo laga dhacay inta u dhexeysa ismaamullada Isiolo iyo Marsabit.
Tani ayaa timid ka dib howlgal ballaaran oo ka dhan ah burcadda oo ay saraakiisha ammaanka ka fuliyeen aagga loo yaqaano Malgis .
Weerarka xoolaha lagu dhacay ayaa la soo tabiyay 11 cishe ka hor.
Taliyaha booliiska ee ismaamulka Marsabit Patrick Mwakio ayaa intaasi ku daray in ciidamada ay sidoo kale dib u soo heleen 12 neef oo dheeraad ah tani oo tirada guud ee xoolaha loo soo celiyay dadkii laga dhacay ka dhigaysa 19.
Burcadda ayaa horay u kaxeysatay 25 neef oo lo’o ah.
Mwakio ayaa wakaaladda wararka ee dalka ee KNA u sheegay in hubka la soo helay uu yahay nooca G3.
