Dowladda ismaamulka Lamu ayaa amar ku bixisay in la xiro goobaha lagu iibiyo cuntada ee ku yaalla hareeraha waddooyinka ka dib markii la soo tabiyay in cudurka daacuunka uu halkaasi ka dillaacay.
Xanuunkan oo ka mid ah cudurrada biyaha ku faafa ayaa la rumeysan yahay inuu ka dhashay biyaha daadadka halkaasi ku dhuftay.
Ganacstada cunnooyinka ku iibiya agagaarka waddooyinka Lamu ayaa si weyn uga soo horjeestay amarka ka soo baxay dowladda hoose ee ismaamulkaasi.
Waxay ku baaqeen in la qaado tallaabooyin kale oo looga hor tagaya faafidda cudurka sida in la xoojiyo nadaafadda balse in aan laga xirin goobaha ay qoysaskooda uga soo saaraan qutul maalmeedka.
Mid ka mid ah shacabka ayaa dhankiisa sheegay in mudnaanta koowaad la siiyo badqabka dadweynaha isagoo waaxda caafimaadka ee ismaamulka Lamu ku taageeray amarka ay bixisay.
