Waxaa sii kordhaya tirada dadka ku geeriyooday fatahaadda webiga Shabeelle uu ka gaystay xaafadaha magaalada Baledweyne ee xarunta gobolka Hiiraan.
Ilaa 8 qof ayaa la xaqiijiyay inay ku geeriyoodeen fatahaadda webiga Shabeelle ee magaalada Beladweyne 24-kii saac ee la soo dhaafay, sida ay warbaahinta u sheegeen maamulka degmada Beledweyne.
Maaamulka degmada Beledweyne ayaa sidoo kale sheegay in fatahaaddu ay sababtay khasaare hantiyadeed oo baaxad leh iyo barakacii ugu xooggana dhowrkii sano ee la soo dhaafay.
Duqa magaalada Beledweyne Nadar Tabaax ayaa sheegtay in hay’addaha samafalka ay ka gaabiyeen wax ka qabashada xaaladaha ka dhashay fatahaadda ee la soo daristay dadkii ku noolaa xaafadaha Beledweyne oo intooda badan u barakacay Ceel Jaalle.
Marwo Nadar ayaa sidoo kale dalbatay in gurmad degdeg ah lala soo gaara dadka reer Beledweyne ee sida weyn u saameysay fatahaadda.
Waxaa xusid mudan in xaafadaha Beledweyne ay wali ku dhex go’doonsan yihiin qoysas badan oo isugu tagay dhulalka taaga ah ee ku yaalla xaafadaha Beledweyne, iyadoo biyaha webiga ay sii xooggeysanayaan saacadba saacadda ka dambeysa.
Ku dhawaad 10 ruux oo ku geeriyootay fatahaadda ku dhufatay Beledweyne
