Guddiga xuquuqul insaanka ee dalka ee (KHRC),hay’adda u dooda xuquuqda muslimiinta ee (MUHURI) iyo Khelef Khalifa oo ka mid ah shacabka Mombasa ayaa si wadajir ah dacwad uga gudbiyay taliyaha guud ee ciidanka booliiska Kenya ,Japhet Koome.
Waxay doonayaan in Koome lagula xisaabtamo dilal booliiska lagu eedeyay oo magaalada Nairobi ka dhacay sanadkii 2017-kii.
Dacwadda ayaa lagu doonaya in lagu faahfaahiyo dhacdooyinkii xigay doorashadii guud ee 2017-kii oo xilligaasi la soo tabiyay in falalka booliiska Nairobi ay ku dhinteen 33 qof.
Japhet Koome ayaa xilligaasi ahaa taliyaha booliiska ee ismaamulka Nairobi.
Ka dib markii guddiga madaxa bannaan ee doorashooyinka iyo xuduudaha dalka ee IEBC uu bishii Siddeedaad ee sanadkaasi shaaciyay in doorashada guud uu ku soo baxay Uhuru Kenyatta ayaa waxaa dibadbaxyo sameeyay taageerayaasha mucaaradka oo ku doodayay in natiijada doorashada lagu shubtay.
Ururrada maxkamadda geeyay dacwadda ayaa sheegaya in dhammaan dadkii xilligaasi la dilay aynan ka qayb qaadan dibadbaxyada oo ay jireen kuwo ku nafwaayay guriyahooda.
Sidoo kale waxaa la doonaya in dacwaddan ay ka soo jawaabaan maamulka madaxa bannaan ee kormeera howlaha booliiska ee IPOA , xafiiska xeer ilaaliyaha guud ee dalka, waaxda dacwad oogidda , guddiga qaran ee xuququul insaanka ee (KNCHR) iyo hay’adda madaxa bannaan ee (IMLU).
