Hoggaamiyaha mucaaradka ee dalka Senegal ,Ousmane Sonko ayaa lagu soo oogay dacwad ah inuu qorsheynaya kacdoon ka dhan ah dowladda wadankaasi.
Waaxda dacwad oogidda ee Senegal ee uu hoggaamiyo Abdou Karim Diop,ayaa sheegtay in siyaasigan loo haysto eedeymo kale sida khalkhal gelinta amniga, inuu xiriir la leeyahay koox gaysata falalka burcadnimo iyo argagixisannimada iyo inuu abuuray xasilooni darro siyaasadeed.
Qareennada siyaasigan ayaan weli dhankooda ka hadlin dacwadda uu wajahaya madaxa mucaaradka ee dalka Senegal.
Toddobaadyo ka hor ayay ahayd markii Sonko oo 49 sano jir ah lagu xukumay labo sano oo xabsi ah ka dib markii lagu eedeyay anshax xumo taasoo sababtay inay dibadbaxyo ka dhacaan guud ahaan wadankaasi.
