Ciidamada qaabilsan amniga xarunta lagu dhaqanceliyo dadka ka soo goosta Al-Shabaab, ayaa ka cabanaya mushaar la’aan dhowr bilood ah.
Askari ka tirsan ciidankan oo la xiriiray idaacadda laanta afka soomaaliga ee VOA-da, ayaa sheegay in saddexdii bilood ee ugu dambeysay aynan qaadan wax mushahaar ah.
Waxaa uu sheegay inay ilaaliyaan amniga ugu yaraan 250 qof oo ka soo goostay Al-Shabaab, kuwaas oo ku jira xerada Sarendi oo ku taalla magaalada Muqdisho.
Sarkaalkan ayaa xusay in hay’adda gacanta ku haysa xaruntan inay ku wargelisay in aynan mushaar u haynin sanadkan cusub.
Dhanka kale, wasiirru dowlaha amniga xukuumadda Soomaaliya Maxamad Cali Xagaa ayaa sheegay inuu jiro heshiis dhexmaray dowladda Soomaaliya iyo hay’adda.
Wasiirru dowlaha ayaa sheegay in lagu heshiiyay in dowladdu si tartiib tartiib ah ula wareegto xarumaha dhaqancelinta Al-Shabaab.
Waxaa uu intaasi ku daray in mushaarka ciidamada cabanaya uu dib u billaabanayo bishan Maarso.
Wasiirka ayaa sheegay in arrintaasi heshiis ay ka gaareen dowladda Soomaaliya iyo hay’adda socdaalka adduunka ee IOM.