Galmudug oo Puntland ku eedeysay inay diiwaangelin sharci darro ah ka wado gobolka Mudug

Maamulka Galmudug ayaa ku eedeyay dhigooda Puntland in diiwaangelin doorasho ay ka sameyneyso deegaano ka tirsan kuwa Galmudug.
Mas’uuliyiin ka tirsan Galmudug ayaa sheegay in deegaano ka tirsan gobolka Mudug ay Puntland ka sameysay diiwaangelin sharci darro ah.
Galmudug ayaa sheegtay tallaabooyinka caynkan ah inay dhaawacayaan nabadgalyada iyo wada shaqeynta labada maamul, iyagoo ugu baaqay Puntland inay joojiso diiwaangelinta.
Maamulka Galmudug ayaa sheegay deegaanada laga sameeyay diiwaangelinta inay ka mid tahay Dhinowda, Hirsalaama iyo deegaano kale oo ka tirsan degmada Gaalkacyo.
Si kastaba ha ahaatee diiwaangelinta ka socota gobolka Mudug ayaa ah diiwaangelinta doorashooyinka dowladaha hoose ee Puntland.
Puntland weli kama jawaabin eedeymaha ka soo yeeray maamulka Galmudug.