Golaha qaran ee ka talo-bixiya arrimaha islaamka ee KEMNAC ayaa gaashaanka u daruuray soo jeedinta ah in xilka qaadiga guud ee Kenya loo dhiibo haweeney.
Guddoomiyaha golahan Sheekh Juma Ngao ayaa xusay in arrinkaasi uunan waafaqsanayn diinta islaamka sidaas awgeedna aan lagu tallaaba qaadi karin.
Waxaa uu cadeeyay in hadii haweenka ay doonayaan in ay ku biiraan maxkamadaha caadiga ah ee dalka aynan jirin cid ka hor taagan balse wixii ku saabsan xukun ku saleysan diinta islaamka aanan marnaba loo oggolaan doonin maadaama shareecada aynan u fasaxin.
Shir jaraaid oo ay KEMNAC qabatay ayuu sheekh Juma Ngao sidoo kale faahfaahin kaga bixiyay sababaha qof dumar ah aynan qaadi u noqon karin.
Sheekh Camiir Zaani oo ka mid ah culimada gobolka xeebta ayaa dhankiisa wacad ku maray in ay habaari doonaan shakhsiyaadka arrinkan u ololeynaya isaga oo ku boorriyay in ay ka tanaasulaan.
