Madaxweyne William Ruto ayaa u safray Jamhuuriyadda Zambia si uu uga qayb galo xafladda caleemo-saarka Madaxweynaha Zambia Hakainde Hichilema, kaas oo mar kale loo doortay xilka 18-kii Agoosto.
Madaxweyne Hichilema oo 64 jir ah ayaa helay 60% codadkii la dhiibtay 13-kii Agoosto, isagoo ka adkaaday 13 musharrax oo kale. Dhaliilayaasha ayaa sheegay in doorashadu ahayd mid ay dowladdu si adag u maamushay.
Madaxweyne Ruto ayaa horay u ammaanay guusha Hichilema, isagoo sheegay inay xoojin doonto hoggaamintiisa ku wajahan horumarinta Zambia.
Ruto wuxuu sidoo kale sheegay in guusha Hichilema ay sii xoojin doonto xiriirka laba geesoodka ah ee Kenya iyo Zambia, isla markaana ay ballaarin doonto iskaashiga labada dal.
Khudbaddiisa guusha, Hichilema wuxuu ballanqaaday inuu u shaqeyn doono shacabka, isla markaana madaxweynanimadiisa u adeegsan doono horumarinta iyo kobcinta dalka.
Hichilema wuxuu xilka hayay tan iyo 2021.
Dhanka kale, Brian Mundubile oo 55 jir ah, kana mid ahaa musharraxiintii ugu horreysay ee madaxtinimada, ayaa galay kaalinta labaad isagoo helay 38% codadka. Waxaa lagu soo oogay dacwad khiyaano qaran ah.
Xarigga hoggaamiyaha mucaaradka ayaa sii kordhiyay walaaca laga qabo sida dowladda Zambia ula dhaqanto dadka siyaasadda ka aragtida duwan.
Booliisku waxay Mundubile iyo ku-xigeenkiisii Makebi Zulu ku eedeeyeen inay khatar ku yihiin amniga qaranka, kaddib markii ciidamada ammaanku ay gurigiisa baaritaan ku sameeyeen maalin kadib doorashada, ayna sheegeen inay halkaas ka heleen qoryo iyo qalab ciidan.
