Golaha Sare ee Muslimiinta Kenya ee (SUPKEM) ayaa ugu baaqay Muslimiinta dalka inay si buuxda uga qaybqaataan wadahadallada ku saabsan qorshaha cusub ee qaranka ee “hiigsiga sanadka 2030”, kaas oo loogu talagalay inuu beddelo qorshaha dalka ee sanadkaas.
Baaqan ayaa yimid kaddib markii Madaxweyne William Ruto toddobaadkii hore ugu baaqay shacabka iyo ururrada kala duwan ee dalka inay ka qaybqaataan wadahadal qaran oo lagu dejinayo qorshe horumarineed oo fog.
Hiigsiga 2030 ayaa ahaa qorshe lagu doonayay in Kenya looga dhigo dal warshadaysan oo leh dhaqaale dhexdhexaad ah, isla markaana shacabka loo abuuro nolol tayo wanaagsan leh, iyadoo la ilaalinayo deegaan nadiif ah iyo amni.
Guddoomiyaha SUPKEM, Hassan Ole Naado, ayaa sheegay in ururka uu si buuxda u taageersan yahay hindisaha 2030, isla markaana Muslimiintu ay ka qaybqaadan doonaan wadahadallada qaran, ha noqoto shaqsi ahaan ama iyagoo matalaya ururro abaabulan.
Ole Naado ayaa sidoo kale ugu baaqay siyaasiyiinta inay joojiyaan loollanka iyo mucaaradka ku saleysan dano xisbi, isagoo sheegay in horumarinta dalka ay tahay inay ka muhiimsanaato tartanka siyaasadeed iyo wareegyada doorashooyinka.
Wuxuu sheegay in Kenya ay hal jiil gudaheed ku gaari karto isbeddel weyn oo siyaasadeed iyo dhaqaale-bulsho haddii qorshaha cusub ee horumarinta muddada dheer si joogto ah loo hirgeliyo, lagana ilaaliyo cadaadiska iyo saameynta doorashooyinka.
Guddoomiyaha SUPKEM ayaa xusay in horumar waara uu u baahan yahay iskaashi dhinacyo badan ah, oo ay qayb ka yihiin xasilinta dhaqaalaha, horumarinta kaabeyaasha, kobcinta aqoonta iyo xirfadaha bulshada iyo xoojinta hay’adaha dowladda.
Waxa uu carrabka ku adkeeyay in koboc dhaqaale iyo bulsho oo waara uu ku xirnaan doono wada-shaqeynta dowladda, ganacsatada iyo bulshada.
