Guddiga Midowga Afrika (AUC) ayaa ammaanay habsami u socodkii doorashadii madaxtinimo ee Uganda ee dhacday 15-kii bishan Janaayo, isagoo sidoo kale hambalyo u diray madaxweyne Yoweri Kaguta Museveni ka dib dib u doorashadiisa.
War saxaafadeed la sii daayay Sabtidii, guddoomiyaha AUC, Mahmoud Cali Youssouf, ayaa sheegay in doorashada ay u dhacday si wanaagsan, isla markaana Museveni uu ku guuleystay 71.61 boqolkiiba codadkii la dhiibtay.
AUC ayaa sidoo kale muujisay qaddarin gaar ah oo ay u hayso madaxweynihii hore ee Nigeria, Goodluck Jonathan, oo hoggaaminayay wafdiga wadajirka ah ee Midowga Afrika, COMESA iyo IGAD ee kormeerka doorashada Uganda. Warbixinta ayaa xustay doorkii uu ka qaatay hagidda iyo kormeerka dadaallada heer gobol iyo qaaradeed.
Mahmoud Cali Youssouf ayaa mar kale adkeeyay sida Midowga Afrika uga go’an tahay taageeridda dimuqraadiyadda iyo maamul wanaagga guud ahaan qaaradda, isaga oo sidoo kale ku bogaadiyay shacabka Uganda ka qaybqaadashadooda doorashada, taas oo uu ku tilmaamay tallaabo lagu xoojinayo dimuqraadiyadda, nabadda, amniga iyo horumarka.
Hadalka Midowga Afrika ayaa imanaya xilli ay Uganda ka taagan tahay xiisad siyaasadeed, ka dib markii Guddiga Doorashooyinka uu ku dhawaaqay natiijooyinka kama dambaysta ah ee doorashada.
