Madaxweynaha Mareykanka Donald Trump ayaa sheegay in heshiis lagu soo afjarayo dagaalka Ruushka ee Ukraine uu “aad ugu dhow yahay sidii hore” ka dib markii hoggaamiyeyaasha muhiimka ah ay wadahadallo ku yeesheen magaalada Berlin, balse dhowr mas’uul ayaa sheegay in khilaafaad muhiim ah ay weli ka taagan yihiin arrimaha dhuleed.
Trump ayaa Isniintii u sheegay saxaafadda in uu “wadahadallo aad u dheer oo aad u wanaagsan” la yeeshay Madaxweynaha Ukraine Volodymyr Zelenskyy iyo hoggaamiyeyaasha Faransiiska, Jarmalka, Boqortooyada Ingiriiska iyo NATO.
Zelenskyy ayaa dhankiisa sheegay in wadahadallada lala yeeshay hoggaamiyeyaasha Mareykanka iyo Yurub ay ahaayeen kuwo adag balse wax soo saar leh.
Wadahadallada heerka sare ah, oo ay ku lug lahaayeen Zelenskyy, wafdi Mareykan ah oo uu hoggaaminayo ergeyka gaarka ah ee Steve Witkoff, wiilka Trump soddogga u yahay, Jared Kushner, iyo hoggaamiyeyaasha Yurub, ayaa ka dhacay Berlin laba maalmood gudahood iyadoo cadaadis sii kordhaya uu ka yimid Xukuumadda Washington oo ku aaddan Kyiv inay tanaasul u sameyso Xukuumadda Moscow si loo soo afjaro mid ka mid ah colaadaha ugu dhimashada badan Yurub tan iyo Dagaalkii Labaad ee Adduunka.
War saxaafadeed ka soo baxay wadahadallada, hoggaamiyeyaasha Yurub ayaa sheegeen in iyaga iyo Mareykanka ay ka go’an tahay inay si wadajir ah uga wada shaqeeyaan sidii loo siin lahaa “dammaanad qaad amni oo xooggan” Ukraine, oo ay ku jiraan “ciidamo badan oo Ukraine ah” oo Yurub ay hoggaamiso oo uu taageero Mareykanka.
