Hoggaamiyeyaasha Mucaaradka ayaa dowladda Madaxweyne William Ruto ku eedeeyay inay si degdeg ah wax uga qaban waaysay xaaladda abaarta ee Waqooyiga dalka.
Mucaaradka Midaysan ayaa Khamiistii ku boorriyay dowladda inay si degdeg ah ula dhaqanto xaaladda abaarta ee ka sii daraysa ee Waqooyiga waddanka.
Inta lagu guda jiray shir jaraa’id oo ay ku qabteen guriga Chui House ee ah xaruunta dhexe ee Xisbiga DAP-K ee xaafadda Karen hoggaamiyeyaasha, oo ay ku jiraan Kalonzo Musyoka, Rigathi Gachagua, Justin Muturi, iyo Eugene Wamalwa ayaa ku eedeeyeen dowladda inay tahay mid aan degganayn maadaama abaarta ay burburisay bulshooyinka waqooyiga waqti dalka intiisa kale uu isu diyaarinayo xilliga ciidaha.
Waxaa ay xuseen in intii lagu jiray doorashadii ku celiska ahayd ee dhawaan la soo gabagabeeyay, cuntooyinka sida digirta, bariiska, iyo galleyda loo weeciyay goobaha codbixinta si loo soo jiito codbixiyayaasha halkii loo jiheyn lahaa gobollada abaarta saameysay halkaas oo qoysaska ay aad ugu baahan yihiin.
Waxaa ay sidoo kale ku eedeeyeen in agabka gargaarka ee loogu talagalay waqooyiga dalka loo wareejiyay gobollada Galbeedka iyo Bartamaha dalka si ay u saameeyaan codbixiyayaasha.
Madaxda ayaa cambaareeyeen tallaabadaas oo ay ku tilmaameen mid ceeb ah, mas’uuliyad darro ah, iyo mid aan danayn qoysaska dhibaataysan ee waqooyiga.
Hoggaamiyeyaasha Mucaaradka Midaysan ayaa ku boorriyay dowladda inay xaaladda ula dhaqanto xaalad degdeg ah oo ay abaabulaan dhammaan agabka la heli karo si loo yareeyo abaarta. Waxaa ay sidoo kale ugu baaqeen dowladaha ismaamullada inay dib u habeeyaan miisaaniyadahooda si ay u taageeraan meelaha ay dhibaatadu saameysey.
Waxaa ay sidoo kale codsi u direen xildhibaannada si ay si degdeg ah u daba galaan qaab dhismeedka sharci dejinta ee maaraynta khatarta masiibada.
Eugene Wamalwa, oo soo jeediyay bayaanka, ayaa xasuusiyay dalka in intii uu ahaa wasiirka wasaaradda barnaamijyada gaarka ah, Hindise sharciyeedka Maareynta Musiibooyinka iyo Khatarta la qoray oo loo gudbiyay Baarlamaanka.
Waxaa uu sharraxay in hindise sharciyeedka uu hadda dhexdhexaadin ku socdo labada aqal isla markaana ay tahay in mudnaanta la siiyo sababtoo ah waxaa uu ka kooban yahay dhammaan farsamooyinka loo baahnaa si wax ku ool ah looga qabto dhibaatooyinka sida abaarta socota.
