Dambi baarayaasha DCI-da ayaa gobolka Embu ku xiray lix tuhmane oo lala xiriirinayo inay ku lug lahaayeen bililiqo ka dhacday deegaankaas xilligii mudaaharaadyadii dhacay 25-kii Juun ee sanadkan.
Sida ay sheegtay Waaxda Dambi-baarista ee DCI-da, Eedeysanayaashan ayaa lagu helay Alaabo kala duwan oo la soo xaday, kuwaasi oo loo maleynayo in lagu soo qaatay qalalaasihii ka dhashay mudaaharaadyadii ay hoggaaminaayeen dhallinyaradda.
Dadka la xiray ayaa waxaa ka mid ah Peter Mugane Kuria oo 22 jir ah, Ian Macharia Wangare oo 19 jir ah iyo Joseph Musila Mugo oo 45 jir ah oo laga helay mashiinka dharka lagu dhaqdo oo la xaday.
Dambi baarayaasha ayaa waxaa kaloo ay soo qabteen Maxwell Wafula Ongae, oo 28 jir ah, ka dib markii ay ogaadeen badeecooyin tafaariiqeed oo kala duwan oo la sheegay in laga xaday dukaan maxalli ah oo ku yaal hoygiisa.
Jackson Njagi, oo 29 jir ah, ayaa la xiray ka dib markii ay booliiska gacanta ku dhigeen dhalooyin qamri oo la xaday iyo xirmo silig bir ah.
Dhanka kale, Brian Mbuvi, oo 26 jir ah, ayaa laga helay Guriga Martida ee Downtown isagoo wata alaab badan oo la bililiqaystay, oo ay ku jiraan laba kombuyuutar, telefishan, saddex kabo, dhowr saacadood oo kuwa gacanta ah, jaakado, surwaal jiinis ah iyo fiilooyinka korontada.
Dhammaan lixda eedaysane ayaa weli ku jira gacanta booliiska, waxaana la filayaa in la soo taago maxkamadda sharciga ee Embu maalinta Isniinta ee 30-ka bishan June.
