Madaxweynaha dalka William Ruto ayaa sheegay in dowladda Kenya ay diyaar u tahay in ay la shaqeyso guddoomiyaha cusub ee guddiga Midowga Afrika ee (AUC) Mahamoud Ali Youssouf iyo ku xigeenkiisa Selma Haddadi oo shalay lagu doortay magaalada Addis Ababa ee dalka Itoobiya.
Mahamoud ayaa tartanka uga guulaystay Raila Odinga oo matalayay Kenya iyo wasiirkii hore ee wasaaradda arrimaha dibadda ee Madagascar Richard Randriamandrato.
Ruto ayaa qoraal uu soo dhigay bartiisa rasmiga ee X ku xusay inuu madaxweynayaasha dalalka Afrika uga mahadcelinaya garab istaaggii ay u muujiyeen Mr. Odinga in kastoo ugu dambeyn aynan guusha raacin musharraxii Kenya.
Waxaa uu sidoo kale u hambalyeeyay guddoomiyaha cusub ee AUC-da iyo ku xigeenkiisa oo uu u ballan qaaday taageero buuxda.
Ruto ayaa sheegay in tartanka uunan ahayn mid ku saabsanaa shakhsiyaad iyo dalal balse mustaqbalka Afrika.
Waxaa uu intaasi ku daray in mustaqbalka uu yahay mid ifaya oo ayna sii wadi doonaan ka shaqeynta midnimada iyo horumarka shacabka ku nool qaaradda Afrika si saameyn loogu yeesho saaxadda caalamiga ah.
