Ciidamada booliiska ee ismaamulka Nairobi ayaa xaqiijiyay in qarax gaas ka dhashay uu ka dhacay xaafadda Ngara ee caasimadda dalka.
Warbixinta booliiska waxaa ku cad in ay qarxeen oo uu dab ka dhashay haamaha gaaska cuntada lagu karsado ee xarun si jumlo ah loogu iibiyo agabkan taasi oo ku taalla agagaarka waddada Desai Road.
Dhacdadan ayaa la soo tabiyay abaare 5:28 daqiiqo ee aroornimo ee maanta.
Booliiska ayaa intaasi ku daray in baabuurta dab damiska ee ismaamulka Nairobi iyo ciidamada sida gaarka ah u tababaran ee GSU-da ay dabkaasi ka falceliyeen oo aynan jirin cid ay waxyeello ka soo gaartay.
Waxaa la rumeysan yahay in qaraxa gaaska uu ka dhacay dukaanka milkiile magaciisa lagu soo koobay Stephen.
Dabka oo si durba ah u faafay ka hor inta aan la damin ayaa burburiyay meherado ganacsiyo iyo guriyo halkaasi ka ag-dhow.
Ilaa iyo hadda lama cayimin qiimaha hantida ku burburtay.
