Xalay fiidkii, ayaa waxaa ciidamada Somaliland iyo kuwa deegaanka uu dagaal ku dhex maray magaalada Laascaanood, dagaalkaasi oo billaabmay abaaro 8-dii iyo dheeraad fiidnimo ayaa wararku sheegayaan inuu socday qiyaastii laba saacadood wax ku dhow.
Ilaa haatan ma jiraan warar faahfaahsan oo ka soo baxay khasaaraha ka dhashay dagaalkaasi, halka labada dhinac midkoodna wax war ah kama soo saarin.
Waxaa ay noqonaysa markii ugu horraysay ee ay labada dhinac gorrodda is daraan goor habeenimo ah tan iyo markii dagaalku halkaa ka billaabmay muddo haatan sagaal maalmood ah laga jooga.
Xaaladda magaalada Laascaanood ayaa haatan degan.
Kooxda gargaarka degdegga ah ayaa sheegay in dad kooban oo ay waxyeello soo gaartay ay yimaadeen isbitaallada.
Waxayse kooxdani shaki ka qabaan in ay jiri karaan dad ay dhibaato soo gaartay oo la ogaan doono aroorta hore ee maanta.
Fiidadkii ayay dadka waxey ka qaadan jireen goobaha ganacsiga wixii ay quudan lahaayeen, iyadoo dagaalkii xalay taasi uu hor istaagay.
