Madaxweynaha dalka Soomaaliya Xasan Sheekh Maxamuud ayaa ka hadlay dagaalka ka dhanka ah Al-Shabaab ee xilligan ka socda meelo ka mid ah wadankaasi iyo sida laga yeelayo Ciidamada Macawiisleyda ee la dagaalamaya kooxdaasi.
Madaxweynaha oo khudbad ka jeedinayay kulan bulshada Soomaaliyeed ee ku nool Qaaradda Yurub ay ku taageerayaan dagaalka ka dhanka ah Al-Shabaab oo ka lagu qabtay Magaalada caasimadda ee Roma ee dalka Talyaaniga ayaa sheegay in howlgalka ka danka ah Al-Shabaab uu weli ka socdo wadanka.
Waxaa uu sheegay in kaalinta ugu weyn ee howlgalka ka dhanka ah Al-Shabaab ay leeyihiin Ciidamada Macawiisleyda, islamarkaana qorshahooda uu yahay sidii Ciidamadaasi loo qarameyn lahaa loogana dhigi lahaa Booliis ilaalinaya amniga deegaannada laga saaray Al-Shabaab.
Ugu dambeyn Madaxweynaha Soomaaliya ayaa ugu baaqay Soomaalida ku nool dalka dibaddiisa inay qayb weyn ka qaataan oo dhaqaalo ku taageeraan dagaalka dalka goobaha ay ka joogaan looga saarayo Al-Shabaab.
